Sænskir grunnskólar taka upp kennsluverkefnið Biophiliu

Tveir grunnskólar í Sundsvall verða fyrstir í Svíþjóð til að taka upp kennsluverkefnið Biophilia. Verkefnið byggist á að nota sköpun sem menntunar- og rannsóknaraðferð þar sem náttúruvísindi, tónlist og tækni eru tengd saman á nýstárlegan hátt.

Sænska ríkissjónvarpið greinir frá því að íslensk sendinefnd hafi verið að störfum í Sundsvall í vikunni til að kenna kennurum við skólann á Biophiliu.

Auður Rán Þorgeirsdóttir, verkefnisstjóri Biophiliu, segir í samtali við SVT að helsti fókus verkefnisins sé að brjóta upp hefðbundnar kennsluaðferðir. „Við viljum vinna þvert á kennslugreinarnar og samtvinnum náttúruvísindi, tónlist og tækni og hvetjum börn til að skapa og vinna með frumkvöðulinn í sjálum sér.“

Vilja fá nemendur til að rannsaka hluti frekar

Hagaskolan og Höglundaskolan í Sundsvall eru fyrstu skólarnir í Svíþjóð til að taka upp aðferðina, sem miðar meðal annars að því að efla áhuga nemenda á náttúruvísindum.

„Við viljum vekja áhuga nemenda og veita þeim sjálfstraust til að rannsaka hlutina frekar,“ segir Auður.

Raungreinakennarinn Per Lundholm segist spenntur fyrir og fagnar verkefninu sem jafnframt sé áskorun fyrir kennarana. „Ég er ekki vanur því að vinna með tónmenntakennaranum. Nú neyðumst við til þess í haust og í vor. Það er mjög spennandi og áskorun fyrir hugann,“ segir Lundholm í samtali við SVT.

Viðamikið kennsluverkefni

Þegar Biophilia var kynnt var því lýst í frétt mennta- og menningarmálaráðuneytsins sem viðamiklu kennsluverkefni sem byggi á víðtækri þátttöku fræðimanna, vísindamanna, listamanna, kennara og nemenda á öllum skólastigum.

Verkefnið var þróað af Björk Guðmundsdóttur, Reykjavíkurborg og Háskóla Íslands í tengslum við útkomu plötu hennar Biophilia árið 2011. Þá voru haldnar tónvísindasmiðjur fyrir börn samhliða tónleikum Bjarkar í Hörpu, en þær hafa síðan verið reyndar víða um  heim, svo sem í New York, Buenos Aires, Osló og Tokyo.

Ísland fór með formennsku í Norrænu ráðherranefndinni á síðasta ári og fólst formennskan meðal annars í því að leiða ýmis norræn samvinnuverkefni, þar á meðal Biophiliu.