Fimmta Kea-hótelið í Reykjavík mun rísa við Þórunnartún

Keahotels hefur í hyggju að kaupa húsnæðið við Þórunnartún 4, beint á móti hinu nýopnaða  Fosshóteli, þar sem unnið hefur verið að byggingu nýs hótels. Fyrirtækið er við það að ganga frá samkomulagi um kaupin á húsnæðinu, þar sem fimmta Keahótelið í Reykjavík myndi rísa.

Frá þessu er greint í Viðskiptablaðinu. Líkt og fram hefur komið, hófust framkvæmdir á lóðinni í október síðastliðnum og stóð til að þar myndi rísa fimm hæða og 93 herbergja hótel. Fráfarandi eigendur húsnæðisins drógu hins vegar áform sín til baka eftir að bygging hófst. 

Fosshótel, stærsta hótel landsins, opnaði þar beint á móti í byrjun júní en byggingaraðilar hótelanna tveggja deildu þó nokkuð í vetur.

Fyrir rekur Keahotels Hótel Borg, Apótek Hótel, Skugga Hótel og Reykjavík Lights í Reykjavík auk þriggja hótela á Norðurlandi.

Uppfært 6. júlí klukkan 9:40

Magnús Einarsson hjá Landmark, fulltrúi eigenda Þórunnartúns 4 sem reisa hótelið, segir áform eigenda um að reisa hótelið, sem afhent verður rekstraraðila 1. september næstkomandi, með öllu óbreytt.

„Ýmsir aðilar hafa sýnt því áhuga að kaupa rekstrarfélagið og fasteignina fullbúna. Viðræður við aðila hafa átt sér stað um aðkomu að rekstri og kaup á húseigninni fullbúinni.  Ekki hefur verið gengið frá neinu í þeim efnum, enn sem komið er.“

Magnús segir framkvæmdum miða vel. Um 80 manns vinni við hana á hverjum degi enda styttist í opnun. Hótelið verði vandað 3. stjörnu borgarhótel.