Viðskipti innlent

Fagna afnámi banns við lyfjaauglýsingum

Stefán Ó. Jónsson skrifar
Búið er að afnema bann við lyfjaauglýsingum í íslensku sjónvarpi.
Búið er að afnema bann við lyfjaauglýsingum í íslensku sjónvarpi. Vísir/getty
Félag atvinnurekenda og samstarfsfélag þess, Samband íslenskra auglýsingastofa (SÍA), fagna því að Alþingi hefur samþykkt frumvarp heilbrigðisráðherra um að afnema bann við lyfjaauglýsingum í sjónvarpi.



„Félögin hafa undanfarin ár bent á að bann við auglýsingum á lausasölulyfjum í sjónvarpi feli ekki eingöngu í sér takmörkun á viðskiptafrelsi, heldur sé það einnig brot á tjáningarfrelsi og rétti neytenda til upplýsinga,“ segir í tilkynningu frá félögunum. Þá stenst bannið ekki skuldbindingar Íslands samkvæmt samningnum um Evrópska efnahagssvæðið, en Evrópudómstóllinn hefur dæmt á þann veg í sambærilegu máli.



SÍA ritaði Kristjáni Þór Júlíussyni heilbrigðisráðherra bréf vegna málsins í september 2013 og skoraði á ráðherra að aðhafast í málinu, ella yrði að leita atbeina dómstóla eða Eftirlitsstofnunar EFTA vegna málsins.



„Við fögnum því að íslenska heilbrigðisráðherra hafi ásamt Alþingi bundið enda á  brot á Evrópureglum með þessum lögum,“ segir Valgeir Magnússon, formaður SÍA. „Bannið við lyfjaauglýsingum í sjónvarpi hefur alla tíð verið mjög sérkennilegt. Það eru engin sjáanleg rök fyrir því að taka einn miðil út úr og banna auglýsingar sem eru leyfðar í öllum öðrum miðlum.“



Ólafur Stephensen, framkvæmdastjóri Félags atvinnurekenda, segir mikilvægt að frumvarpið hafi verið samþykkt. Áður hefur komið fram tillaga á Alþingi um að afnema bannið og ekki náð fram að ganga. Þetta er mikilvægt skef til sanngirni í lagaumhverfni lyfjafyrirtækja og auglýsingastofa.



Mest lesið


Fleiri fréttir

Sjá meira


×

Mest lesið