Veiði

Veiði hófst í Elliðaánum í morgun

Karl Lúðvíksson skrifar
Hanna Guðrún Sigurjónsdóttir með fyrsta laxinn úr Elliðaánum í sumar
Hanna Guðrún Sigurjónsdóttir með fyrsta laxinn úr Elliðaánum í sumar Mynd: KL
Það hefur alltaf verið hátíðleg stund þegar Elliðaárnar opna fyrir veiðimönnum og það var engin breyting á þetta árið.

Sú hefð, frá borgarstjórnartíð Jóns Gnarr, að Reykvíkingur ársins opni ánna hefur haldið áfram hjá Degi B. Eggertssyni borgarstjóra og í ár var það Hanna Guðrún Sigurjónsdóttir sem fékk þann heiður að renna fyrst í ánna undir styrkri leiðsögn leiðsögumannsins Ásgeirs Heiðars. Að venju er rennt í Sjávarfossinn fyrst en þar var ekki lax í morgun að því er virtist. Ásgeir fór þá með Hönnu í Fosskvörn sem er rétt fyrir neðan Sjávarfossinn og þar tók ekki nema eitt rennsli til að setja í lax.

Eftir snarpa baráttu var fyrsta laxi sumarsins kominn á land klukkan 7:30 og var það um 4 punda hrygna sem tók maðk. Þetta var maríulax Hönnu og miðað við fagmannlega takta við bakkann er ljóst að þarna er veiðikona fædd. Fjölmennt var við ánna í morgun að venju á þessum fyrsta veiðidegi en ásamt fjölmennu liði fjölmiðlamanna var stjórn SVFR og árnefnd mætt við bakkann eldsnemma í morgun. Þessi byrjun lofar mjög góðu í ánni enda virtist laxinn vel haldinn og þetta getur ekki annað en lofað góðu fyrir sumarið.

 



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.