Jakob stígur til hliðar

Jakob Ásmundsson mun láta af störfum sem forstjóri Straums fjárfestingabanka þegar sameiningarferli við MP banka lýkur. Hann hefur starfað hjá bankanum í tíu ár, fyrst sem framkvæmdastjóri og síðustu tvö ár sem forstjóri.

Í tilkynningu frá Straumi segir Jakob að betra sé að hafa einn forstjóra en tvo, og því hafi hann ákveðið að stíga til hliðar, en upphaflega stóð til að forstjórarnir yrðu tveir. „Ég tók á sínum tíma þátt í stofnun Straums og hef upplifað bæði súra tíma og sæta með bankanum. Ég hef lengi verið sannfærður um að eðlilegt væri að styrkja stöðu bankans með ytri vexti.

„Kaup Straums á ráðandi hlut í Íslenskum verðbréfum og stórum hlut í MP banka voru liður í undirbúningi þess samruna sem nú er framundan. Sameinaður banki mun hafa mikið afl, meðal annars vegna sterkrar stöðu ÍV á eignastýringarmarkaði. Fyrir vikið tel ég fjölmörg sóknarfæri framundan. Hins vegar hef ég frá upphafi talið það betra að hafa einn forstjóra í stafni bankans en ekki tvo. Þess vegna kýs ég að stíga til hliðar á þessum tímamótum og óska ég bæði samstarfsfólki mínu í Straumi og starfsfólki og stjórn sameinaðs banka alls hins besta,“ segir Jakob.