Heyri fjárfestar "þetta reddast“ koma þeir aldrei aftur

Fái erlendir fjárfestar þau svör að „þetta reddist“ varðandi mögulegar áskoranir við að reisa gagnver hér á landi fara þeir og koma aldrei aftur. Þetta sagði Björgvin Skúli Sigurðsson, framkvæmdastjóri markaðs- og viðskiptaþróunar hjá Landsvirkjun á fundi fyrirtækisins um hvað ráði staðsetningu gagnvera í morgun.

Phil Schneider, forseti Site Selectors Guild, sem unnið hefur að vali á staðsetningu gagnavera um allan heim sagði Ísland að mörgu leiti vel í stakk búið að taka á móti gagnaverum en þó væru stór atriði sem Íslendingar þyrfti sjálfir að vinna að.

Leggja þyrfti mikið upp úr kynningarstarfi á fýsileika Íslands sem kosti fyrir gagnver. Viti fjárfestar lítið sem ekkert um Ísland geri þeir ráð fyrir því versta. Aðrar þjóðir t.d. Svíar hafi farið í skipulagt markaðsstarf til að lokka gagnaver til landsins sem gefið hafi góða raun.

Gagnaverabransinn harður heimur

Björgvin sagði að menn eins og Phil sé ekki í neinu góðgerðastarfi. Íslendingar þurfi að hafa öll svör á reiðum höndum vilji þeir fá gagnaver hingað til lands.

„Þetta er ansi grimmur bransi og samkeppni sem er í þessum bransa sem hann er í. Það eru aðilar að skoða Ísland og við vitum ekkert að því. Það eru aðilar sem koma hér að spyrja okkur kurteisra spurninga eins og Phil en ef hann fær ekki svörin sem hann vill fer hann og kemur ekkert aftur,“ segir Björgvin.

Atriðin þurfi ekki að vera flóknari en hvernig jarðskjálftavirkni á Íslandi sé. Svari menn „þetta reddast“ séu fjárfestarnir flúnir. „Ef þú segir svona: „Þetta reddast“, þá kemur Phil aldrei aftur. Þetta er svarið sem gerir það að verkum að við erum að detta út af þessum listum,“ segir Björgvin.

Ívilnanir hluti af leiknum

Phil sagði brýnt að ríkið veitti ívilnanir til stuðnings við nýfjárfestingar. Hann heyri kvartað yfir slíkum ívilnunum um allan heim. Honum sé sagt að slíkt sé ósanngjörn ríkisaðstoð og gangi gegn hugmyndinni um frjálsan markað.

„En svona er virkar leikurinn og þetta eru leikreglurnar,“ segir Phil enda veiti ríki um heim allan slíkar ívilnanir. Þær skapi ábata sé verið að koma með nýtt fé og hefja nýja starfsemi í landinu.

Þá þurfi íslenskt stjórnvöld að leggja meira upp úr skjótvirkir stjórnsýslu. Langan tíma taki að taka ákvarðanir og veita leyfi hjá hinu opinbera. Kosturinn sé hins vegar að slíkt sé í höndum Íslendinga sjálfra.

Phil bætti við að glugginn sem Íslendingar hefðu til að laða að sér gagnaver yrði ekki opinn um alla framtíð. Íslendingar þyrftu sem fyrst að fara að móta sér stefnu í þessum efnum svo þau myndu ekki dragast aftur úr í samkeppni við önnur ríki.

Sjá má fund Landsvirkjunar í morgun í heild sinni hér að neðan.