Auglýst eftir tækjum til sprengjuleitar á nýjum útboðsvef

Utbodsvefur.is, nýr vefur um útboð á vegum hins opinbera hefur verið opnaður. Markmið vefsins er að auðvelda aðgengi að upplýsingum um fyrirhuguð innkaup á vegum opinberra aðila með því að birta á einum stað auglýsingar um opinber útboð.

Meðal auglýsinga sem finna má á vefnum eru sprengjuleitartæki fyrir flugvöllinn í Keflavík og rammasamningur Ríkiskaupa á þjónustu iðnaðarmanna og verktaka.

Á nýja vefnum birtast auglýsingar og tilkynningar um fyrirhuguð innkaup opinberra aðila sem falla undir lög og reglugerðir um opinber innkaup. Undir það flokkast innkaup ríkis, sveitarfélaga og veitufyrirtækja þegar fjárhæðir innkaupa eru yfir innlendum og erlendum útboðsmörkum. 

Í tilkynningu kemur fram að á útboðsvefnum muni opinberir aðilar geta auglýst innkaup undir viðmiðunarmörkum til að tryggja gegnsæi. Vefurinn greiði einnig fyrir rafrænum innkaupum.

Eftirtaldir  eru ásamt fjármála- og efnahagsráðuneytinu  í samstarf um hinn nýja útboðsvettvang: Ríkiseignir, Framkvæmdasýsla ríkisins, Landsnet, Orkuveita Reykjavíkur , Reykjavíkurborg, Ríkiskaup og Vegagerðin.

Vonir standa til að fjölga opinberum aðilum sem nýta vefinn.