IKEA innkallar PATRULL öryggishlið

IKEA hefur ákveðið að innkalla PATRULL KLÄMMA OG PATRULL SMIDIG öryggishliðin sem fest eru með þvingum. Fyrirtækið mælir ekki með því að hliðin séu notuð efst í stigaop.

Í tilkynningu frá IKEA segir að það sé öruggt að nota öryggishliðin með þvingum í dyraop á milli herbergja eða neðst í stigaop.

„IKEA hafa borist tilkynningar um að núningsmótstaðan milli veggjarins og þvingunnar á öryggishliðinu hafi ekki verið næg til að halda hliðinu á sínum stað. Þar að auki sé hætta á að hrasa um kantinn neðst. Ef öryggishliðið er sett upp efst í stigaop getur því skapast slysahætta. Þrjár tilkynningar hafa borist á heimsvísu um börn sem hafa slasast eftir fall niður stiga. Ekki er vitað til þess að slíkt hafi gerst hér á landi.

Viðskiptavinir sem vilja halda PATRULL KLÄMMA eða PATRULL SMIDIG öryggishliðinu sínu og nota það á milli herbergja eða neðst í stiga geta sett sig í samband við IKEA og fengið uppfærðar notkunarleiðbeiningar og viðvörunarmiða til að setja á öryggishliðið.

Viðskiptavinir sem vilja skila PATRULL KLÄMMA eða PATRULL SMIDIG öryggishliði með dagsetningarstimplinum 1510 (ár/vika) eða eldri, geta komið með það í verslunina og fengið að fullu endurgreitt. Einnig er hægt að fá framlengingar á hvaða PATRULL öryggishlið sem er endurgreitt. Ekki er nauðsynlegt að sýna kvittun til að fá endurgreitt.

PATRULL KLÄMMA og PATRULL SMIDIG öryggishlið hafa verið seld í IKEA frá 1. ágúst 1995,“ segir í tilkynningunni.