Bluebird semur við Emirates um fraktflug frá Íslandi

Bluebird Cargo hefur gert samstarfssamning við EmiratesSkyCargo, stærsta fraktflugfélag heims, um flugfrakt milli Íslands og yfir 100 borga um allan heim.

Með þessu segir BluebirdCargo geta boðið íslenskum inn- og útflytjendum að tengjast flugnetiEmiratesSkyCargo í Dublin á Írlandi. Bluebird flýgur þangað hvern virkan dag.  EmiratesSkyCargo, sem er frakthluti Emirates flugfélagsins, flýgur til 144 áfangastaða í 81 landi um tengiflugvöll sinn í Dubai.  Emirates flýgur tvisvar á dag á milli Dublin og Dubai á Boeing 777 breiðþotu.

„Þetta nýja samkomulag gerir okkur kleift að bjóða íslenskum inn-og útflytjendum alveg nýja flutningsmöguleika á hagstæðum kjörum, þar sem varan kemst hratt og örugglega á milli og hægt er að tryggja góða vörumeðhöndlun alla leið“ segir Magnús H. Magnússon sölustjóri BlubirdCargo í tilkynningu frá félaginu.



BlubirdCargo telur að með tilkomu þessa nýja samnings geti fyrirtækið boðið enn þéttriðnara net fyrir flugfrakt milli Íslands, Evrópu og um allan heim styrkt tengingar til og frá Asíu alveg sérstaklega, en einnig Afríku og Eyálfu.