Búmenn í greiðslustöðvun

Húsnæðissamvinnufélagið Búmenn er farið í greiðslustöðvun. Héraðsdómur Reykjavíkur veitt félaginu í dag rétt til greiðslustöðvunar fram til 5. júní n.k.  Á meðan freista stjórnendur Búmanna að koma nýrri skipan á fjármál félagsins.

Búmenn eiga nú 541 íbúð í 13 sveitarfélögum og eru langflestar þeirra eða um 93 prósent í notkun. Stærstur hluti íbúðanna eða um 90 prósent þeirra eru á höfuðborgarsvæðinu eða í nágrannasveitarfélögum.

Félagsmenn Búmanna kaupa svokallaðan búseturétt í íbúðunum og greiða síðan rekstur íbúðanna á kostnaðarverði. Í tilkynningu kemur fram að að greiðslustöðvun muni ekki hafa áhrif á réttindi eða skyldur búseturétthafa Búmanna, s.s. rétt þeirra til áframhaldandi búsetu í fasteignum sínum.

Vanskil jukust í kjölfar bankahrunsins

Þá kemur einnig fram í tilkynningunni að í kjölfar bankahrunsins árið 2008 hafi vanskil búseturétthafa aukist sem og að uppsögnum á búsetusamningum hafi fjölgað. Saman hafi þetta leitt til vaxandi fjárhagsörðugleika Búmanna sem stjórn og starfsmenn hafa leitast við að leysa úr, meðal annars í samstarfi við Íbúðalánasjóð, aðallánveitanda félagsins.

Lögmannsstofan LEX og endurskoðunarstofan KPMG hafa aðstoðað Búmenn við að koma skipulagi á fjármál félagsins.