Verkalýðsleiðtogi segir samstöðu innan SA að riðlast

Formaður Framsýnar á Húsavík segir greinilegt að samstaðan innan Samtaka atvinnulífsins sé að riðlast. Fjölmörg fyrirtæki vilji ganga að kröfum Starfsgreinasambandsins. Þá hafi SA ekki gert athugasemdir við samning HB Granda um hækkun bónusgreiðslna sem sé svipuð hækkun og Starfsgreinasambandið fari fram á.

Aðalsteinn Baldursson, formaður verkalýðsfélagsins Framsýn á Húsavík, sem er eitt sextán félaga innan Starfsgreinasambandsins sem boðað hafa til verkfalls, segir  það eftir að koma í ljós hvort hugsanlegir kjarasamningar við einstök fyrirtæki innan Samtaka atvinnulífsins haldi gildi sínu verði þeir gerðir. Það sé hins vegar stórfurðulegt ef fyrirtæki sem telji sig hafa burði til að semja á grundvelli krafna Starfsgreinasambandsins fái ekki leyfi til þess að hækka mánaðarlaunin um 35 þúsund krónur.

Sýnist þér á fyrirtækjum á þínu svæði að þau telji að það sé borð fyrir báru til að semja og að þau vilji gera allt sem hægt er til að koma í veg fyrir verkföll?

„Já, þau segja bara hreint út þessi fyrirtæki sem eru innan SA; það er miklu dýrara fyrir okkur að fá verkföll. Við viljum semja um þessar réttlátu kröfur. Við erum með stuðningsyfirlýsingar frá nokkrum fyrirtækjum, sem lýsa fullum stuðningi við okkar kröfur. Þau segja við viljum semja og losna undanverkfalli og verulegu tjóni,“ segir Aðalsteinn.

Hann segir að nýleg ákvörðun HB Granda um að hækka bónusgreiðslur til sinna starfsmanna sé ígildi kjarasamnings þótt Samtök atvinnulífsins muni eflaust þræta fyrir það. Þar með hafi friðarskylda verið rofin samkvæmt ítrustu skilgreiningum.

„En þetta er stórmerkilegt. Verkalýðsfélag Akraness semur við HB Granda undir friðarskyldu frá SA um verulega hækkun á bónus, sem jafngildir því að fólk sé að fá allt að 288 krónur í hækkun á á tímann. En En ítrustu kröfur Starfsgreinasambandsins er hækkun er hækkun á töxtum nú um 244 krónur. Þannig að þetta er óskiljanlegt og þeir hjá SA verða að útskýra þetta fyrir öðrum fyrirtækjum; af hverju þeir leyfa HB Granda að gera þetta undir friðarskyldu,“ segir Aðalsteinn.

Áhugi margra fyrirtækja til að ná samningum við aðildarfélög Starfsgreinasambandsins sýni að samstaðan innan Samtaka atvinnulífsins sé að riðlast.

„Já það er ekki spurning. Samtöl sem ég hef átt við atvinnurekendur undanfarna daga og póstar sem ég er með, staðfesta að það er greinilegt að það er að riðlast samstaðan,“ segir  Aðalsteinn Baldursson.