Fram­kvæmda­stjóri KEA fékk fimm milljóna króna launa­hækkun á milli ára

Laun og þóknanir til stjórnar og stjórnenda Kaupfélags Eyfirðinga, KEA, námu rúmum 32 milljónum króna árið 2014. Þetta kemur fram í ársskýrslu KEA sem lögð var fram á aðalfundi fyrirtækisins í gærkvöldi. Þar kemur fram að Halldór Jóhannsson, framkvæmdastjóri KEA, var með 23,6 milljónir króna í laun fyrir árið 2014 eða tæplega tvær milljónir á mánuði en RÚV veitti þessu fyrst athygli.

Árið 2013 var Halldór með 18,2 milljónir króna í árslaun og hefur því hækkað um rúmar fimm milljónir króna í launum á milli ára. Árið á undan var hann með tæpar 17 milljónir í árslaun.

Hagnaður KEA á síðasta ári nam 467 milljónum króna eftir skatta en var 227 milljónir árið áður. Tekjur námu tæpum 650 milljónum króna og hækkuðu um 250 milljónir á milli ára. Eigið fé er nú rúmir 5,3 milljarðar króna og heildareignir tæpir 6 milljarðar.

Niðurstaðan viðunandi

Halldór Jóhannsson framkvæmdastjóri segir niðurstöðu ársins viðunandi á heimasíðu KEA.

„Flest þeirra fyrirtækja sem KEA á eignarhluti í gengu vel á síðasta ári og endurspeglast það í um 350 milljóna króna jákvæðri gangvirðisbreytingu fjáreigna.“

Halldór segir að fjárfest hafi verið í fyrirtækjum fyrir um hálfan milljarð á liðnu ári.

„KEA hefur enn töluvert af sínum eignum í lausu fé sem bíður fjárfestinga í fyrirtækjum og á meðan svo er hefur það nokkur áhrif á arðsemi félagsins þar sem ávöxtun af lausu fé er ekki sérlega há.“

Arðsemi eigenda félagsins sé mjög góð sé einnig horft til þeirra viðskiptakjara sem eigendur njóti í gegnum KEA kortið. Áætluð afkoma af þeim viðskiptakjörum sé 400-450 milljónir króna umfram reikningshaldslega afkomu á síðasta ári.