Finnfund og Creditinfo Group í samstarf í Austur-Afríku

Finnfund, þróunarfélag í eigu finnska ríkisins, hefur veitt 2,4 milljóna evra eða 354 milljóna króna lán til Creditinfo Group til uppbyggingar á fjármálaþjónustu og hagvexti í Austur-Afríku.

Lánið frá Finnfund mun gera Creditinfo Group kleift að hraða uppvexti fyrirtækisins í álfunni sem hefur það að markmiði að bjóða upp á fjármálalausnir í löndum sem hafa takmarkað aðgengi að fjármagni. Þá veitir fyrirtækið einnig stuðning við lánveitendur svo þeir geti tekið upplýstari ákvarðanir varðandi lánveitingar og fjármálaþjónustu til breiðari hóps viðskiptavina.

„Samstarfið við Finnfund er mjög mikilvægt fyrir Creditinfo Group. Frá því að fjármálakreppan reið yfir árið 2008 hafa íslensk fyrirtæki átt í nokkrum erfiðleikum með að taka lán erlendis. Þessi lánveiting Finnfund er vísbending um að það sé að breytast, fyrir okkur alla vega. Við trúum því að okkar litla framlag til þróunar innviða ýmissa landa eins og í Austur-Afríku hafi orðið til að bæta hag íbúanna. Við viljum aðstoða fólk og smærri fyrirtæki við að fá aðgang að fjármagni í þeim tilgangi að bæta hagvöxt og lífskjör. Við teljum lán Finnfund til Creditinfo Group vera staðfestingu á gagnsemi okkar og mikla viðurkenningu fyrir okkar störf,” segir Reynir Grétarsson, forstjóri Creditinfo Group.

Í tilkynningu frá Creditinfo Group kemur fram að einungis um helmingur mannkyns hefur aðgang að fjármálaþjónustu. Í Afríku er aðgengið takmarkað og er það ástæða þess að Creditinfo Group hefur ákveðið að einbeita sér að því að koma á fót fjölda nýrra starfseininga Creditinfo Group í þessum heimshluta. Stöðvarnar geti skipt sköpum í viðleitninni til að minnka ójöfnuð, að koma á fót almennri fjármálaþjónustu og styðja við hagvöxt.