Heilsuvísir

Stefna á 85 kílómetra hlaup

Rikka skrifar

Elísabet Margeirsdóttir er með frábær innslög í Íslandi í dag þar sem fjallað er um hinar ýmsu útivistaríþróttir. Áhorfendur fá að kynnast fólki sem stundar þær af einskærri ástríðu en einnig  þeim sem eru að stíga fyrstu skrefin.

Í þættinum í gær hitti Elísabet langhlauparana Guðna Pál Pálsson og Örvar Steingrímsson sem æfa um þessar mundir fyrir heimsmeistaramótið í utanvegahlaupum sem fer fram í Annecy í Frakklandi í lok maí. Þeir eru þaulreyndir langhlauparar en hafa aldrei keppt í svona langri vegalengd áður en hlaupið er 85 km langt með 5200 m samanlagðri hæðarhækkun. Þeir eru sammála um að þetta sé alvöru áskorun og við fengum að skyggnast aðeins inn í  undirbúning þeirra. Fylgjast má með félögunum á Facebooksíðu þeirra. Í framhaldinu munum við fylgjast með ferðalagi þeirra og heimsækja þriðja liðsfélagann, Þorberg Inga, sem býr á Akureyri.

Einnig var farið upp í Heiðmörk og fylgst með tvíþrautarkeppni sem þríþrautarfélagið Ægir 3 heldur hvert ár. Þetta er fyrsta keppni ársins hjá þríþrautafólkinu og yfirleitt talinn vorboðinn ljúfi hjá hópnum. Veðrið var gott en aðstæður mjög erfiðar miðað við árstíma, þungt færi á hlaupastígnum og mikil hálka á hjólaleið. Sannkallaðir harðjaxlar mættu til leiks og við spjölluðum við mótshaldara, sigurvegara karla í A flokki og sigurvegara kvenna í B flokki.

Allar nánari upplýsingar um mótið og æfingar hjá Ægi 3 má finna heimasíðu félagsins



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.



Velkomin á Vísi. Þessi vefur notar vafrakökur. Sjá nánar.