Facebook stefnt vegna persónunjósna

25 þúsund manna hópur í Austurríki hefur stefnt Facebook vegna brota á lögum Evrópusambandsins um friðhelgi einkalífsins og þátttöku í Prism, njósnaforriti Þjóðaröryggisstofnunar Bandaríkjanna, NSA. The Guardian greinir frá.

Stefnan var lögð fram á þriðjudag af Max Schrems, 27 austurískum lögfræðingi og baráttumanni fyrir friðhelgi einkalífsins.

Allir sem eiga aðild að lögsókninni fara fram á sömu bæturnar, 500 evrur eða um 73 þúsund íslenskar krónur. Þá hafa 55 þúsund manns til viðbótar heitið því að taka þátt í lögsókninni á seinni stigum málsins.

Sjá einnig: Snowden segir Bandaríkin safna nektarmyndum sem þú sendir

„Við erum í raun að biðja Facebook um að hætta fjöldaeftirliti, setja upp alvöru persónuverndarstefnu sem fólk skilur, en einnig að hætta að safna gögnum um fólk sem er ekki einu sinni á Facebook,“ segir Schrems.

Lögsókninni er beint að höfuðstöðvum Facebook í Evrópu sem staðsettar eru í Dublin en þar eru allir notendur Facebook sem ekki eru í Bandaríkjunum og Kanada skráðir.