Bílaflotinn aldrei verið eldri

Meðalaldur íslenska bílaflotans var 12,7 ár og hefur hann aldrei verið hærri samkvæmt nýútkominni Árbók bílgreina árið 2015.

Um 12 þúsund nýskráningar bifreiða voru á síðasta ári og er það þriðjungsfjölgun milli ára. Þrátt fyrir þessa fjölgun heldur bílaflotinn áfram að eldast. Hærri aldur bílaflotans er rakinn aftur til hrunsins en nýskráningar bifreiða voru í sögulegu lágmarki árið 2009. Einungis 16% bílaflotans er yngri en 5 ára en hlutfallið var jafnan á bilinu 30-40% fyrir bankahrunið.



Meirihluti bíla eldri en 10 ára

Stærsti hluti bílaflotans, eða um þriðjungur hans, er á aldrinum 6-10 ára. Þar er um að ræða bíla sem fluttir voru inn á árunum 2004-2008. Næst flestar eru bifreiðar á aldursbilinu 11-15 ára en samanlagt er um 55%  bílaflotans á þessum aldri.

„Með hækkandi aldri bílaflotans má gera ráð  fyrir að heimilin þurfi að bera aukinn kostnað af viðhaldi auk þess sem  farið er á mis við bætta eldsneytisnýtingu og öryggi sem yngri bílar bjóða gjarnan,“ segir í árbókinni.