Orkuveitan hagnast um tæpa níu milljarða

Orkuveitan greiddi rúma 20 milljarða króna í afborganir af lánum en þetta kemur fram í tilkynningu frá OR. Í árslok nam eigið fé OR 99,4 milljörðum króna og eiginfjárhlutfallið var komið í 33,2%.

Í tilkynningunni segir að stöðugleiki í tekjum og varanlegur sparnaður hjá Orkuveitu Reykjavíkur hafi skilað fyrirtækinu sambærilegum rekstri á árinu 2014 og árin tvö á undan.

Rekstarkostnaður Orkuveitunnar nam á árinu 2014 13,7 milljörðum króna. Það er 300 milljónum króna lægri kostnaður en árið 2010 þegar hann var 14,0 milljarðar. Sé tekið mið af þróun verðlags í landinu, sem hefur hækkað um 14%, er raunlækkun rekstrarkostnaðar 2,3 milljarðar króna.

Árið 2014 var fyrsta rekstrarárið eftir lögboðna uppskiptingu Orkuveitu Reykjavíkur. Ársreikningur samstæðunnar, sem samþykktur var á stjórnarfundi Orkuveitu Reykjavíkur í dag, er settur fram með sama hætti og fyrr. 

„Planið og staðfesta við að fylgja því hefur fært Orkuveitunni stöðuga og góða afkomu síðustu ár. Með markvissum áhættuvörnum og festu í rekstrinum hefur líka tekist að auka fyrirsjáanleika í afkomu fyrirtækisins,“ segir Bjarni Bjarnason, forstjóri Orkuveitunnar.

Hann segir einnig að skuldir lækki hratt og örugglega og eiginfjárstaðan sé að verða viðundandi.

„Þessa sér líka stað í batnandi lánshæfismati óháðra aðila á Orkuveitunni. Við þessar aðstæður er mikilvægt að halda vöku sinni og slá hvergi af þeirri kröfu sem við gerum til okkar sjálfra, að gæta hagsýni í hvívetna. Stefnumótun eigenda Orkuveitunnar, Eigendastefnan, var endurnýjuð á árinu 2014 og er fyrirtækinu vegvísir í að halda skarpri sýn á starfsemina.“

Bjarni segir að árið 2014 hafi verið fyrsta rekstrarárið eftir lögboðna uppskiptingu Orkuveitu Reykjavíkur.

„Ársreikningur samstæðunnar sýnir að stjórnendum og starfsfólki hefur hvergi fipast við þessa breytingu. Stöðugleiki var í starfseminni, þjónusta við viðskiptavini traust og afkoman í takti við áætlanir.“