Sjö ára bið Harrington eftir PGA-sigri á enda

Honda Classic kláraðist í dag en bestu kylfingum PGA-mótaraðarinnar tókst ekki að klára mótið í gær vegna þrumuveðurs sem gerði þeim lífið leitt nánast alla helgina.

Þrátt fyrir það var keppnin mjög spennandi en að loknum 72 holum voru Padraig Harrington og nýliðinn Daniel Berger jafnir í efsta sæti á sex höggum undir pari, einu höggi á undan Russel Knox, Paul Casey og Ian Poulter sem komu á fimm undir.

Það þurfti því að grípa til bráðabana þar sem Harrington hafði betur á annarri holu eftir að hafa fengið par en Berger krækti sér í tvöfaldan skolla.

Margt hefur drifið á daga Harrington síðan að hann sigraði síðast í móti á PGA-mótaröðinni en það var sjálft PGA-meistaramótið árið 2008. Undanfarið hefur þessi brosmildi kylfingur átt erfitt uppdráttar en bakmeiðsli og vandamál með púttin, sem hafa oftar en ekki verið hans sterkasta hlið, hafa hamlað honum töluvert.

Harrington hóf leik á PGA-National vellinum á fimmtudaginn í 297. sæti á heimslistanum í golfi en ásamt því að skjótast upp listann með sigrinum í dag fær hann 140 milljónir króna í verðlaunafé ásamt þátttökurétt á stærstu mótum ársins í golfheiminum.  

Næsta mót á PGA-mótaröðinni er sjálft Cadillac meistaramótið sem hluti er af heimsmótaröðinni í golfi en það hefst á fimmtudaginn.