Mikil fjölgun gistinótta í janúar

Gistinóttum á hótelum í janúar fjölgaði um 35 prósent milli ára samkvæmt gögnum frá Hagstofu Íslands. Heildarfjöldi gistinótta var 161.400 í janúar. Erlendir ferðamenn voru þar af í miklum meirihluta og gistu 87 prósent af öllum gistinóttum.

Gistinóttum erlendra ferðamanna fjölgaði um 41 prósent milli ára en gistinóttum Íslendinga fjölgaði um 3 prósent.

Flestar gistinætur á hótelum voru á höfuðborgarsvæðinu í janúar eða 127.500 sem er 31 prósent aukning miðað við janúar 2014. Næstflestar voru gistinætur á Suðurlandi eða um 15.900.

Bretar gistu flestar gistinætur í janúar eða 59.700, þar á eftir komu Bandaríkjamenn með 25.500, og þá gistu Þjóðverjar 7.700 gistinætur hér á landi í janúar.

Nýting herbergja var best á höfuðborgarsvæðinu í janúar eða 83 prósent. Á Suðurnesjum var herbergjanýting rúm 44 prósent.