Hrein eign Lífeyrissjóðs verzlunarmanna tæpir 510 milljarðar

Afkoma Lífeyrissjóðs verzlunarmanna á árinu 2014 var afar góð en á árinu 2014 stækkaði sjóðurinn um 55 milljarða króna og var hrein eign til greiðslu lífeyris í árslok 509 milljarðar króna. Þetta kemur fram í tilkynningu frá Lífeyrissjóðnum.

Í tilkynningunni segir að þennan vöxt megi m.a. þakka því að á árinu náðist 8,7% hrein raunávöxtun eigna sjóðsins.

Tryggingafræðileg staða sjóðsins styrktist umtalsvert og var hún í lok árs jákvæð sem nemur 5,1%. Tryggingafræðileg staða er mælikvarði á getu sjóðsins til að standa við skuldbindingar sínar gagnvart lífeyrisþegum í framtíðinni.

Fjárfestingartekjur voru 46 milljarðar.  Iðgjaldagreiðslur námu um 20,5 milljörðum króna. Greiðandi sjóðfélagar voru um 48 þúsund á árinu. Allir eignaflokkar sjóðsins skiluðu jákvæðri ávöxtun.

Samsetning eigna tók nokkrum breytingum á árinu, hlutdeild innlendra hlutabréfa hækkaði úr 16% í 19%, erlend verðbréf hækkuðu úr 27% af heildareignum í 29% og skuldabréf og bankainnstæður lækkuðu úr 57% í 52%eigna.

Lífeyrissjóður verzlunarmanna greiddi um 12.700 lífeyrisþegum alls 9,6 milljarða króna í lífeyri úr sameignardeild á árinu 2014. Þetta eru 10% hærri lífeyrisgreiðslur en árið á undan, en lífeyrisþegum fjölgaði um 7,2% á sama tíma.