Landsnet býður út vinnu við lagningu tæplega 40 km af jarðstrengjum

Útboðsgöng vegna jarðvinnu og lagningar Selfosslínu 3 annars vegar og Hellulínu 2 hins vegar eru til afhendingar í móttöku Landsnets frá og með deginum í dag og skal tilboðum skilað á sama stað fyrir kl. 14, annars vegar miðvikudaginn 18. mars vegna Selfosslínu 3 og hins vegar 20. mars vegna Hellulínu 2.

Þetta kemur fram á vefsíðu Landsneta. Selfosslína 3 er 25 km langur 66 kílóvolta (kV) jarðstrengur milli Selfoss og Þorlákshafnar sem á að auka afhendingaröryggi raforku í Hveragerði, Þorlákshöfn og á Selfossi.

Á vefsíðu Landsneta segir að rekstraráreiðanleiki vestari hluta svæðiskerfisins á Suðurlandi sé frekar takmarkaður í dag og því verði mikill ávinningur af hringtengingu svæðisins með umræddum streng að mati Landsnets. Ráðgert er að leggja strenginn að mestu meðfram vegum sem fyrir eru á svæðinu og miðast útboðsgögnin við að verkinu verði að fullu lokið 15. nóvember nk.

Hellulína 2 er 13 km langur 66 kV jarðstrengur meðfram Suðurlandsvegi frá tengivirki við Hellu að tengivirki við Hvolsvöll. Strengurinn mun auka flutningsgetu og afhendingaröryggi á svæðinu en hann leysir af hólmi núverandi loftlínu, Hellulínu 2 frá 1948, sem er með elstu línum í flutningskerfinu og þarfnast orðið endurnýjunar. Áætluð verklok eru 15. október nk. samkvæmt útboðsgögnum.

Útboðsgögn vegna Selfosslínu 3 og Hellulínu 2 eru afhent á geisladisk í móttöku Landsnets frá og með deginum í dag. Tilboð í verkin skulu berast á sama stað, fyrir kl. 14 þann 18. mars í Selfosslínu 3 og fyrir klukkan 14 þann 20. mars í Hellulínu 2, þar sem þau verða opnuð að viðstöddum þeim bjóðendum sem þess óska.