Kaupa rekstur Keiluhallarinnar í Egilshöll

Simmi og Jói og fjölskyldan í Múlakaffi hafa keypt rekstur Keiluhallarinnar í Egilshöll. „Jói, nafni minn í Múlakaffi, vakti athygli okkar á þessu tækifæri fyrir nokkru síðan og í kjölfarið ákváðum við að taka höndum saman. Við hlökkum mikið til samstarfsins við Jóa, hann er reynslubolti og alveg sérdeilis skemmtilegur náungi.“, segir Jóhannes Ásbjörnsson, sölu- og markaðsstjóri Hamborgarafabrikkunnar.

Í tilkynningu segir að fjölskyldan í Múlakaffi hafi í gegnum árin byggt upp umsvifamikið fyrirtæki og sinni veitingarekstri í Múlakaffi og víðsvegar um höfuðborgarsvæðið. “Simmi og Jói hafa mikla reynslu af því að skapa fjölskylduvæna stemningu og upplifun í sínum rekstri. Það er nákvæmlega það sem Keiluhöllin stendur fyrir. Þess vegna lá beinast við að fá þá til að taka með okkur í þetta verkefni.”, segir Jóhannes Stefánsson í Múlakaffi.

Kveðja keiluna stolt

Í tilkynningunni segir að Rúnar Fjeldsted og eiginkona hans, Björk Sigurðardóttir, ætli að einbeita sér að fasteignaþróunarverkefnum í Öskjuhlíð og líta glöð yfir farinn veg. „Keiluárin okkar hafa verið frábær en nú er komið að tímamótum. Það hefur legið fyrir í nokkurn tíma að Keiluhöllin í Öskjuhlíð myndi loka þar sem að við erum með ákveðið fasteignaþróunarverkefni í undirbúningi þar. Því er ánægjulegt að svo öflugur hópur sé að taka við kyndlinum í Egilshöllinni”, segir Rúnar Fjeldsted.

Þá segir aðí Keiluhöllinni í Egilshöll sé öll aðstaða og búnaður í heimsklassa og að að hafi veitingaaðstaðan fengið alþjóðleg verðlaun árið 2013.

“Við erum að taka við virkilega fallegri Keiluhöll af Rúnari og Björk og Egilshöllin er fyrir löngu búin að sanna sig sem ein stærsta íþrótta- og afþreyingarmiðstöð Íslands. Okkar markmið er að auka veg og vanda Keiluíþróttarinnar ásamt því að  auka þjónustu við einstaklinga, hópa og fjölskyldur í leit að afþreyingu og góðum mat. Sem stendur er veitingastaður rekinn við hlið Keiluhallarinnar, sem og frábær sportbar. Við höldum þeim rekstri áfram fyrst um sinn, en kynnum svo til sögunnar nýjan veitingastað með haustinu”, segir Sigmar Vilhjálmsson, framkvæmdastjóri Keiluhallarinnar.

Egilshöllin í Grafarvogi er stærsta afþreyingar- og íþróttamiðstöð á Íslandi eða um 31.000 fermetrar.

Katrín B. Sverrisdóttir, framkvæmdarstjóri Egilshallarinnar segir yfir þrjú þúsund manns sækja í þá þjónustu sem er til staðar í Egilshöll á hverjum degi en gestafjöldi hefur tvöfaldast frá árinu 2010. „Nú þegar er þarna staðsett eitt vinsælasta bíóhús landsins, líkamsræktarstöð, skautasvell auk góðrar íþróttaaðstöðu fyrir ungmenni og aðra hópa. Uppbygging starfsseminnar í Egilshöllinni hefur því gengið gríðarlega vel, og t.a.m. er verið að byggja nýtt fimleikahús sem verður yfir 2.000 m² til viðbótar við þá aðstöðu sem er fyrir. Við hlökkum til að fá nýja eigendur inn í Keiluhöllina í Egilshöll og teljum að þeirra aðkoma að húsinu muni styrkja enn frekar sterka  starfsemi okkar. Það er mikill fengur að fá fjölskylduna í Múlakaffi að þessum rekstri enda reynslumikið fólk þar á ferðinni.  Sömuleiðis er alltaf líf og fjör í kringum Simma og Jóa og við teljum að það verði engin breyting á því í þessu verkefni, enda er Keiluhöllin í Egilshöll gríðarlega vinsæl fyrir fjölskyldufólk og vinahópa sem koma alls staðar frá.“