Ný hluthafastefna Gildis-lífeyrissjóðs

Stjórn Gildis-lífeyrissjóðs hefur samþykkt nýja hluthafastefnu sjóðsins. Hluthafastefnan markar stefnu og stjórnarhætti Gildis-lífeyrissjóðs sem eiganda í þeim félögum sem hann fjárfestir í en þetta kemur fram í tilkynningu frá Gildi.

Stjórn sjóðsins vill stuðla að auknu gegnsæi og ábyrgð sem eigandi og fjárfestir á markaði. Markmið Gildis-lífeyrissjóðs er m.a. að beita sér sem eigandi í félögum þar sem sjóðurinn er hluthafi, í þeim tilgangi að stuðla að langtímahagsmunum og sjálfbærni þeirra og ábyrgum stjórnarháttum.

„Innlendur hlutabréfamarkaður hefur verið að stækka og eflast undanfarin ár sem leiðir til nýrra vinnubragða hagsmunaaðila á markaði, bæði hlutafélaga og ekki síður fjárfesta. Sjóðurinn er orðinn virkari hluthafi í félögum en áður og vill því axla ábyrgð til samræmis við það hlutverk,“ segir í tilkynningunni.

Þar segir einnig að við endurskoðun hluthafastefnunnar horfði stjórn sjóðsins meðal annars til þróunar og umræðu í Evrópu og OECD tengdri endurskoðun á reglum um stjórnarhætti og innleiðingu þeirra ásamt umræðu hagsmunaaðila  hérlendis.  

„Stjórn sjóðsins vill í takt við þá þróun leggja sitt af mörkum til þess að bæta stjórnarhætti og stuðla þannig að framþróun á innlendum hlutabréfamarkaði.“

Gildi-lífeyrissjóður hefur innleitt vissar breytingar á undanförnum árum í átt að bættum stjórnarháttum, s.s. með birtingu hluthafastefnu, samskipta- og siðareglum og skipan valnefndar.  

„Á síðastliðnu ári auglýsti sjóðurinn eftir einstaklingum sem gefa kost á sér til setu í stjórnum félaga. Við val á einstaklingum sem Gildi tilnefnir og styður til stjórnarsetu fylgir sjóðurinn faglegu ferli þar sem hæfi, menntun, þekking og reynsla er könnuð. Einnig er hugað að samsetningu hverrar stjórnar með hliðsjón af fjölbreyttri þekkingu, reynslu og kynjahlutfalli.“

„Við teljum það eitt af hlutverkum okkar hjá Gildi að stuðla að ábyrgum og góðum stjórnarháttum.  Innleiðing á nýrri hluthafastefnu er hluti af því og vonum við að stjórnir félaga sem sjóðurinn hefur fjárfest í og aðilar á markaði taki vel í þessa viðleitni sjóðsins,“ segir Árni Guðmundsson framkvæmdastjóri Gildis.  

Helstu áherslur í nýrri hluthafastefnu:

Stjórnarhættir Gildis-lífeyrissjóðs sem hluthafa eru útfærðir með skipulegum hætti ásamt eftirfylgni hans og áherslum.

Lögð er áhersla á gagnkvæm samskipti við stjórnir og kveðið á um form, fyrirkomulag og efni samskipta með skipulegum hætti.

Áhersla er lögð á aukna virkni hluthafafunda sem vettvang fyrir hagsmunaaðila til að skiptast á skoðunum ásamt tillögugerð og ákvarðanatöku.

Sett eru fram tiltekin viðmið sem sjóðurinn telur rétt að hafa til hliðsjónar við mótun starfskjarastefna félaga, greiningu á áhrifum þeirra og viðmið um upplýsingar sem sjóðurinn telur æskilegt að séu tilgreindar í skýrslum um framkvæmd starfskjarastefna.