Marel fækkar starfsmönnum um 150

Jón Hákon Halldórsson skrifar 21. janúar 2015 17:21

Árni Oddur Þórðarson er forstjóri Marel. Vísir/anton brink.

Marel ætlar að fækka starfsmönnum sínum um 150 vegna frekari einföldunar og hagræðingar í rekstri félagsins. Þetta kemur fram í tilkynningu sem send var Kauphöllinni eftir lokun markaðar í dag. Þar er um að ræða störf í Bandaríkjunum og Singapore. Í tilkynningunni segir að Marel muni í gegnum allt ferlið styðja við þá starfsmenn sem aðgerðirnar hafa áhrif á.

Ráðist verður í viðamiklar breytingar sem nánar er gert grein fyrir hér að neðan:

• Vöruframboð félagsins hefur verið endurskoðað með það að markmiði að auka slagkraftinn á þeim sviðum þar sem félagið hefur skýrt samkeppnisforskot og sterka markaðsstöðu. Á þeim grundvelli mun félagið hætta framleiðslu á frystum í Singapore. Félagið mun engu að síður bjóða áfram frysta í vörulínum sínum með samstarfssamningi við leiðandi framleiðendur á því sviði. Undirbúningur þessara aðgerða er þegar hafinn og búist er við að framleiðslueiningunni í Singapore verði að fullu lokað fyrir mitt ár 2015. Kostnaður þessu tengdur er bókaður sem einskiptiskostnaður í fjórða ársfjórðungi 2014 en búast má við ávinningi fyrir félagið og auknum rekstarhagnaði frá og með seinni helmingi þessa árs.

• Framleiðslustarfsemi Marel í Des Moines, Iowa verður sameinuð starfseiningu félagsins í Gainesville, Georgíu. Markmiðið með þessum fyrirhuguðu breytingum er samþætting í rekstri starfseininganna sem mun styrkja samkeppnisstöðu félagsins. Aðgerðin er til samræmis við þá stefnu félagsins að hámarka framleiðslukerfið og auka áherslu á stærri einingar þar sem mismunandi iðnaðir koma saman undir einu þaki. Flutningar á framleiðslustarfsemi frá Des Moines til Gainesville munu hefjast í janúar 2015 og verður aðgerðinni að fullu lokið fyrir árslok 2015. Kostnaðurinn sem af aðgerðinni hlýst verður bókaður sem einskiptiskostnaður í fyrsta ársfjórðungi 2015 og ávinningsins verður vart frá og með árinu 2016.

• Þessu til viðbótar tilkynnir Marel nú um fjárfestingu í nýrri nýsköpunarmiðstöð í Des Moines sem sinnir einkum lausnum fyrir kjötiðnað og fyrir frekari vinnslu matvæla. Nýja nýsköpunarmiðstöðin mun leysa af hólmi núverandi starfsstöð og stefnt er að sölu á landi og byggingum þar á móti nýrri fjárfestingu.

Í tilkynningunni kemur fram að í kjölfar þessara breytinga muni starfsemi Marel í Bandaríkjunum samanstanda af: framleiðslueiningu í Gainesville, framleiðslueiningu í Seattle, Washington, sölu- og þjónustumiðstöð í Lenexa, Kansas og að lokum nýsköpunarmiðstöð í Des Moines. Allar fjórar einingarnar muni halda áfram sölu- og þjónustustarfsemi. Eftir breytingarnar verða starfsmenn Marel í Bandaríkjunum um 600 og munu þeir þjónusta Bandaríkjamarkað sem er í örum vexti um þessar mundir.

Mest lesið

Fleiri fréttir