66°Norður opnar barnafataverslun í Kaupmannahöfn

66°Norður opnaði barnafataverslun í Illum í Kaupmannahöfn á laugardaginn en um er að ræða 25 fermetra verslunarrými sem hannað var af íslenska hönnunarteyminu HAF.

Árið 2013 festi ítalska fyrirtækið La Rinascente kaup á Illum og hefur undanfarið ár lagt mikið fjármagn í að endurbæta útlit og skipulag versluninarinnar og er ljóst að þessi 123 ára danska verslun er nú komin í hóp allra glæsilegustu verslana Evrópu.

Opnun verslunar 66°Norður í Illum kemur í kjölfar eigin verslunar sem fyrirtækið opnaði í Kaupmannahöfn í lok október og er fyrirtækið því að styrkja stöðu sína enn frekar á danska markaðnum.

„Illum leggur mikinn metnað í að bjóða upp á sterk og vönduð vörumerki og er það því mikill heiður fyrir 66°Norður að vera eitt af þeim merkjum sem verslunin teflir fram. Við leggjum áherslu á að framleiða barnafatnað úr bestu fáanlegu efnum enda er yngsta kynslóðin kröfuharðir útivistargarpar sem fara út í öllum veðrum. Forsvarsmenn Illum telja barnafatnað 66°Norður sameina fallega hönnun og gæði sem standast ítrustu kröfur viðskiptavina þeirra. Þetta er mjög spennandi skref fyrir okkur og við hlökkum til að aðstoða yngstu útvistargarpana í Kaupmannahöfn við að takast á við dönsku lægðirnar", segir Helgi Rúnar Óskarsson, forstjóri 66°NORÐUR.