Sendiráðið þróar innri vef Isavia

Isavia og vefstofan Sendiráðið hafa skrifað undir samning um þróun innri vefs Isavia og dótturfélaga.

Notendur innri vefsins verða um 800 talsins og starfa vítt og breitt um landið. Vefurinn verður samfélagsmiðaður og opnar á nýja og spennandi möguleika fyrir notendur.

„Við hjá Isavia erum afar ánægð með samninginn. Við erum með þessu að fara framsækna leið í vefmálum, þ.e. með uppsetningu á samfélagsmiðuðum innri vef. Markmiðið er að efla liðsanda fyrirtækisins og samræma menningu, auðvelda aðgengi starfsfólks að upplýsingum um starfið og félagslíf og færa þeim almennt betra verkfæri til að sinna starfi sínu,” segir Heiðar Örn Arnarsson, vefstjóri Isavia.

Verkefnið verður unnið í samstarfi við Sigurjón Ólafsson, eins helsta sérfræðings hérlendis á sviði innri vefja og vefumsjónar.

„Við bindum miklar vonir við samstarfið og hlökkum til að fá nýjan uppsettan innri vef á árinu” segir Heiðar Örn Arnarsson vefstjóri ISAVIA.