666 milljóna gjaldþrot félags í eigu Jóns

Tæplega 666 milljónum króna kröfum var lýst í þrotabú Bör hef., félags sem var í eigu Jóns Ragnarssonar athafnamanns. Félagið sem hefur verið tekið til gjaldþrotaskipta hét áður Lykilhótel ehf. og stóð í leigustarfsemi og rekstri hótela og gistiheimila.

Skiptastjóri búsins, Guðrún H. Brynleifsdóttir, sagði í samtali við Mbl.is að engar eignir fundust í félaginu fyrir utan yfirveðsetta fasteign. Þá upplýsti hún að lífeyrissjóður hafi farið fram á skiptin en stærstu kröfuhafarnir voru Landsbankinn með 384 milljóna kröfu og Byggðastofnun með 213 milljóna kröfu.

Fram kemur í umfjöllun Mbl.is að félagið hafi árið 1998 keypt Hótel Gíg á Mývatni. Annað félag, sem skráð er á heimili Jóns, tók svo yfir rekstur hótelsins en það var í febrúar á síðasta ári selt á uppboði til félags í eigu Valdimars Jónssonar, sonar Jóns. Hótelið var síðar selt Keahótelum ehf.

Jón komst nýlega í fréttir þegar hann vísaði veitingamönnum sem ráku staðinn Caruso úr einum af húseignum sínum eftir að leigusamningur rann úr gildi. Staðnum var læst og starfsfólki og eigendum veitingastaðarins meinaður aðgangur að húsinu.

Jón á langan feril að baki í viðskiptum og hefur oft verið til umfjöllunar í fjölmiðlum. Hann erfði hlut í Hótel Valhöll á Þingvöllum frá foreldrum sínum og var lengi kenndur við þann stað. Vísir birti ítarlega umfjöllun um feril Jóns í kjölfar Caruso-málsins. Hana má lesa hér.