Viðskipti innlent

Wow Air áfrýjar til Hæstaréttar

WOW Air hefur ákveðið að kæra til Hæstaréttar þá niðurstöðu héraðsdóms að vísa frá dómsmáli félagsins sem höfðað var vegna úthlutunar afgreiðslutíma á Keflavíkurflugvelli. Páll Rúnar M. Kristjánsson lögmaður Wow Air staðfestir þetta, en hann segir Hæstarétt áður hafa komist að þeirri niðurstöðu að taka beri þetta sama mál til efnismeðferðar. 
 
„Og á WOW Air ekki von á öðru en að Hæstiréttur komist aftur að sömu niðurstöðu,“ segir Páll Rúnar. Málið snýr að úthlutun afgreiðslutíma á Keflavíkurflugvelli en Wow air lagði inn kvörtun til Samkeppniseftirlitsins árið 2013 vegna úthlutunar afgreiðslutíma sem flugfélagið taldi koma í veg fyrir að hægt væri að veita Icelandair samkeppni hvað varðar flug til Bandaríkjanna.
 
„Mál þetta snýst um réttmæti þess að markaðsráðandi fyrirtæki geti setið eitt um ákveðna afgreiðslutíma á Keflavíkurflugvelli sem eru nauðsynlegir þeim sem vilja standa í samkeppni í flugrekstri til og frá landinu,“ segir Páll Rúnar.
 
Áður höfðu fyrirtækin Iceland Express og Delta Airways kvartað yfir fyrirkomulaginu og talið það torvelda samkeppni.

„Samkeppniseftirlitið hefur komist að þeirri niðurstöðu að umrætt fyrirkomulag raski samkeppni og að færa þurfi afgreiðslutíma á milli flugfélaga til að samkeppni geti átt sér stað á jafnræðisgrundvelli. Þetta dómsmál snýst um þá afstöðu og hvort að þessi tilfærsla á afgreiðslutímum sé lögmæt,“ segir Páll Rúnar.
 
Ráðgefandi álits EFTA dómstólsins hefur verið aflað undir rekstri málsins. Þar segir Páll koma fram að samkeppnisyfirvöldum EES-ríkis sé heimilt að beina fyrirmælum til þeirra fyrirtækja sem hlut eiga að máli ef samkeppnisástæður mæla með því.

„​Það er því heimilt að mati EFTA dómstólsins að flytja afgreiðslutíma á milli flugrekenda á grundvelli samkeppnislöggjafar. Miða við þá afstöðu EFTA dómstólsins var því eðilegt og rétt af Samkeppniseftirlitinu að aðhafast í umræddu máli.“


Mest lesið


Fleiri fréttir

Sjá meira


×

Mest lesið