Vélaþróun leyfileg 2015, fyrir suma

Gloppótt reglugerð gerir það að verkum að breytingabannið sem lék Ferrari og Renault grátt í lok síðasta tímabils verður ekki til staðar í ár.

FIA (Alþjóða akstursíþróttasambandið) hefur viðurkennt að mistök leiði til þess að breytingabannið verður ekki í gildi á komandi tímabili. Vélaframleiðendur í Formúlu 1 geta því þróað vélar sínar allt tímabilið.

Gleymst hefur að setja skiladagsetningu fyrir endanlega útgáfu véla fyrir 2015. Í fyrra var 28. febrúar sá dagur sem Ferrari, Mercedes og Renault þurftu að skila tilbúnum vélum fyrir. Enginn slíkur dagur finnst í reglum ársins 2015.

Ekki sitja þó allir vélaframleiðendur við sama borð. Honda, sem ekki var með vélar í Formúlu 1 í fyrra þarf að skila sinni vél fyrir 28. febrúar samkvæmt FIA. Það er vegna þess að vélin er ný og Honda fær því sömu dagsetningu og liðin fengu í fyrra. Hinir vélaframleiðendurnir eru ekki að skila nýjum vélum heldur þróuðum og endurbættum útgáfum af vélum fyrra árs.