Eimskip kaupir Jac. Meisner

Eimskip hefur keypt hollenska flutningsmiðlunarfyrirtækið Jac. Meisner Internationaal Expeditiebedrijf B.V. Þetta kemur fram í tilkynningu frá Eimskip en þar segir að velta flutningsmiðlunarfyrirtækisins nemi um 7,5 milljónum evra og að með áætluðum samlegðaráhrifum við starfsemi Eimskips sé gert ráð fyrir að EBITA hlutfall fyrirtækisins verði á bilinu 8-9 prósent.

„Ég er ánægður með að Jac. Meisner verði nú hluti af Eimskip og hlakka til að vinna með starfsmönnum fyrirtækisins. Kaupin munu styrkja þjónustu við viðskiptavini Eimskips og viðskiptavinir Jac. Meisner munu einnig njóta góðs af alþjóðlegu flutninganeti Eimskips. Kaupin eru liður í stefnu Eimskips um ytri vöxt og munu styrkja enn frekar alþjóðlega frystiflutningsmiðlun félagsins,“ segir Gylfi Sigfússon, forstjóri Eimskips.

Tólf starfsmenn starfa hjá Jac. Meisner og mun Dick Weijgertze framkvæmdastjóri starfa áfram sem sem framkvæmdastjóri fyrirtækisins.

„Flutningsmiðlunargeirinn krefst blandaðra lausna þar sem nýjar flutningalausnir byggja á faglegri reynslu starfsmanna. Með því að sameinast alþjóðlegu flutningsmiðlunarneti Eimskips getum við boðið upp á nýjar flutningalausnir til að tryggja áframhaldandi sterka stöðu Jac. Meisner í Rotterdam með öflugum tengingum fyrirtækisins í Hollandi og öðrum stöðum innan Evrópu,“ segir Weijgertze.