Sensa kaupir Basis

Fyrirtækið Sensa hefur keypt Basis ehf. og verða fyrirtækin sameinuð undir nafni Sensa. Starfsfólk Basis færist til Sensa, en eftir sameininguna hefur Sensa á að skipa tæplega 150 sérfræðingum á Íslandi í rekstri, hýsingu og samskiptalausnum. Þar að auki vinna 15 manns hjá dótturfélagi Sensa í Danmörku.

Basis starfar á sviði rekstrar og hýsingar tölvukerfa. Í tilkynningu frá Sensa, sem er dótturfyrirtæki Símans, segir að sameiningin bjóði upp á stóraukna möguleika á sviði hýsingar og skýlausnar.

Kaupverð er trúnaðarmál. Kaupin eru gerð með fyrirvara um samþykki Samkeppniseftirlitsins.

„Með kaupunum á Basis stóreflum við möguleika Sensa á sviði hýsingar og skýlausna. Basis hefur á að skipa öflugum sérfræðingum sem eru með vottun frá fyrirtækjum á borð við Microsoft, RedHat, Cisco og Fortinet. Fá fyrirtæki hér á landi geta státað af jafn yfirgripsmikilli reynslu af rekstri krefjandi tölvukerfa,“ segir Valgerður H. Skúladóttir, framkvæmdastjóri Sensa, í tilkynningunni.

„Það er sjaldgæft, og í raun einstakt, að fá tækifæri til að taka þátt í verkefni sem þessu, með fólki sem hefur sömu sýn,“ segir Alexander Picchietti, framkvæmdarstjóri Basis.

„Fyrst og fremst sjáum við tækifæri í að bjóða viðskiptavinum okkar upp á stærra og öflugra þjónustuteymi með jafnvel enn dýpri þekkingu á flóknum tæknilausnum. Sameinuð getum við haldið áfram að bjóða framúrskarandi hýsingar- og rekstrarþjónustu til núverandi viðskiptavina en á sama tíma þróað nýjar og spennandi vörur á síbreytilegum markaði.“