Ágústmet hjá Icelandair fallið

Sætanýting í millilandaflugi hjá Icelandair var 89,2 prósent í ágúst, sem er bæting um 3,0 prósentustig milli ára og hefur nýtingin aldrei verið betri í þeim mánuði. Icelandair flutti 413 þúsund farþega í millilandaflugi og voru þeir 17% fleiri en í ágúst á síðasta ári.  Framboðsaukning á milli ára nam 14%.

Farþegar í innanlandsflugi og Grænlandsflugi voru 33 þúsund í ágúst og fjölgaði um 3% á milli ára samkvæmt tilkynningu Icelandair til Kauphallar Íslands.

Framboð félagsins í ágúst var óbreytt samanborið við ágúst 2014. Sætanýting nam 77,5% og jókst um 3,4 prósentustig á milli ára. Seldum blokktímum í leiguflugi fjölgaði um 7% á milli ára.  Fraktflutningar jukust um 5% frá því á síðasta ári. Fjöldi seldra gistinótta á hótelum félagsins jókst um 3% milli ára. Herbergjanýting var 88,8% samanborið við 88,3% í ágúst í fyrra.