Fjölmenni við útför Einars Öder

Fjölmenni var við útför Einars Öder Magnússonar sem fram fór frá Hallgrímskirkju í dag. Þá fylgdi gæðingurinn Glóðafeykir frá Halakoti, sem færði Einari sigur í B-flokki á landsmóti 2012, eiganda sínum síðasta spölinn. Einar hefði orðið 53 ára þann 17. febrúar síðastliðinn en hann hafði glímt við krabbamein.

Einar Öder var stórt nafn í heimi hestamennskunnar, bæði hér heima og erlendis. Hann var farsæll knapi í hestaíþróttum og gæðingakeppni, þjálfari, reiðkennari, hrossaræktandi og viskubrunnur um reiðmennsku sem margir leituðu til. Þá var Einar jafnframt óþreytandi við að kynna íslenska hestinn og vinna að framgangi hans víða um heim.