Ákærður fyrir skattsvik og fjárdrátt: Kjúklingur, bensín og spariföt á reikning fyrirtækisins

Sérstakur saksóknari hefur ákært karlmann á fimmtugsaldri fyrir fjárdrátt, víðtæk skattalagabrot, brot á almennum hegningalögum og lögum um bókhald.

Manninum er gefið að sök að hafa tekið fimmtán milljónir króna út af reikningum fyrirtækisins Dos Toros og nýtt til persónulegra nota á tímabilinu október 2010 til apríl 2011. Hinn ákærði var var bæði stjórnarmaður og prókúruhafi í félaginu.

Keypti, mat, fatnað og skyndibita fyrir mörg hundruð þúsund

Samkvæmt ákærunni á maðurinn að hafa tekið út reiðufé, millifært eða látið aðra millifæra alls 12,4 miljónir króna út af reikningi félagsins til persónulegra eða annarra nota sem ekki tengdust rekstri félagsins. Dos Toros var lýst gjaldþrota í árslok 2011 en skiptum í þrotabúi félagsins er ekki lokið.

Þá er honum gefið að sök að greitt fyrir hinar ýmsu vörur sem nýttar voru til persónulegra nota með debetkorti skráð á reikning Dos Toros frá október 2010 til apríl 2011, alls að upphæð 2,78 milljónir króna.

Stærstur hluti debetkortafærslnanna fólust í að kaupum á bensíni, fatnaði og mat, einkum skyndibita. Alls voru færslurnar 462 á sjö mánaða tímabili samkvæmt ákærunni en stærsta einstaka færslan var í Herragarðinum að upphæð tæplega 200 þúsund krónur.

Selt hluti félags sem aldrei fékk greiðsluna



Hinn ákærði er sakaður um að hafa komið milljónunum fimmtán á reikning Dos Toros með saknæmu athæfi. Þannig hafi hinn ákærði selt búnað og tæki sem voru skráð á annað félag sem hann var stjórnarmaður og prókúruhafi, Álstál ehf. Sölufjárhæðin var, samkvæmt ákærunni, aldrei lögð inn á reikning Álstáls heldur fór beint inn á reikninga Dos Toros. Það fé er hinn ákærði sagður hafa nýtt í eigin þágu eins og áður sagði. Álstál var lýst gjaldþrota í október 2011 en ekkert fékkst upp í lýstar kröfur.

Sagður hafa blekkt Ríkisskattstjóra

Manninum er einnig gefið að sök að hafa breytta færslum í færsludagbók sem tilheyrði bókhaldi Dos Toros. Þá á hann einnig að hafa gefið út tvo tilhæfulausa reikninga á Álstál, upp á samtals 26 milljónir króna en þar af hafi virðisaukaskattur numið 6,78 milljónum króna. Með því hafi hinn ákærði komið sér undan 1,9 milljóna króna greiðslu virðisaukaskatts.

Í kjölfarið hafi hann fengið Ríkisskattstjóra til að samþykkja greiðslu á mismuni innskattar og útskattar sem nam um 4,9 milljónum króna. Upphæðin hafi verið lögð inn á reikning Dos Toros. Þaðan hafi fengist afgangurinn af 15 milljónunum sem hinn ákærði er sagður hafa nýtt til persónulegra nota.

Maðurinn er einnig ákærður fyrir að hafa brotið bókhaldslög með því að varðveita ekki bókhaldsgögn um fyrirtækið á árunum 2010 og 2011.