Tuttugu prósent fjölgun ferðamanna í apríl

Tæplega 72 þúsund erlendir ferðamenn fóru frá landinu í apríl síðastliðnum samkvæmt talningum Ferðamálastofu í Flugstöð Leifs Eiríkssonar eða 12.400 fleiri en í apríl á síðasta ári. Aukningin nemur 20,9 prósentum milli ára.

Aukning hefur verið milli ára alla mánuði frá áramótum eða 34,5 prósent í janúar, 34,4 prósent í febrúar og 26,8 prósent í mars.



Fjórði hver ferðamaður breskur

Um þrír af hverjum fjórum ferðamönnum í apríl árið 2015 voru af tíu þjóðernum. Bretar voru fjölmennastir eða 26,4 prósent af heildarfjölda en næstir komu Bandaríkjamenn eða 15,2 prósent af heildarfjölda. Þar á eftir fylgdu Norðmenn (6,9 prósent), Danir (6,0 prósent) og Þjóðverjar (5,2 prósent).

Af einstaka þjóðernum fjölgaði Bretum og Bandaríkjamönnum mest milli ára en 3.269 fleiri Bretar komu í apríl í ár en í sama mánuði í fyrra og 3.179 fleiri Bandaríkjamenn. Bretar og Bandaríkjamenn báru uppi ríflega helmings aukningu ferðamanna í apríl milli ára.

Tvöfalt fleiri ferðamenn en fyrir fjórum árum

Fjöldi ferðamanna í aprílmánuði hefur nærri fjórfaldast frá árinu 2002. Oftast hefur verið um aukningu að ræða milli ára en mest hefur hún þó verið síðustu fjögur árin. Þannig hefur fjöldi ferðamanna meira en tvöfaldast í aprílmánuði frá árinu 2011.

Það sem af er ári hafa 288.700 erlendir ferðamenn farið frá landinu eða 64.200 fleiri en á sama tímabili í fyrra. Um er að ræða 28,6 prósent aukningu milli ára.

Tæplega 36 þúsund Íslendingar fóru utan í apríl síðastliðnum eða álíka margir og í apríl 2014.