Ekki nóg að vera rótgróinn til að skila hagnaði

Talsverður munur er á afkomu rótgróinna veitingastaða í borginni. Vísir skoðaði nýjustu ársreikninga sjö staða sem allir eiga það sameiginlegt að hafa verið starfræktir um árabil í Reykjavík og í ljós kom að á meðan sumir skila myljandi hagnaði eru aðrir reknir með tapi. Ársreikningarnir eru allir frá 2013.

Gullkýrin Múlakaffi

Mestur hagnaður var hjá Múlakaffi af þeim stöðum sem skoðaðir voru. Félagið sem heldur utan um veitingastaðinn hagnaðist um 135 milljónir króna en auk Múlakaffis á félagið nokkra aðra veitingastaði, til dæmis Kolabrautina, og veisluþjónustu. Þáttur dótturfélaga í hagnaðinum nam 56 milljónum króna.

Staða félagsins virðist afar traust en samkvæmt ársreikningnum var eigið fé þess jákvætt um 279 milljónir króna. Múlakaffi sér um rekstur samnefnds veitingastaðar í Hallarmúla, Nauthóls við Nauthólsvík, veitingasölunnar í Háskóla Reykjavíkur og áðurnefndrar Kolabrautar í Hörpu. Múlakaffi rekur líka mötuneyti víða um bæinn, þar á meðal mötuneyti lögreglunnar og slökkviliðsins.

Arðbært fjölskyldufyrirtæki

Lauga-ás, veitingastaður við Laugarásveg, kemur næst á eftir með hagnað upp á 51 milljón. Staðurinn hagnaðist talsvert á veisluþjónustu sem rekin er undir sömu kennitölu en fjallað var um þjónustuna í Ísland í dag á síðasta ári. Staðurinn rekur sérstaklega útbúinn bíl með fullbúnu eldhúsi til að sinna veitingaþjónustunni en bíllinn hefur verið notaður til að elda ofan í stórstjörnur á borð við Russel Crowe og Anthony Hopkins, sem koma hingað til að leika í kvikmyndum, gjarnan í óbyggðum landsins.

Í myndbandinu hér til hliðar má sjá umfjöllun Ísland í dag um Lauga-ás.

Slæm staða á Horninu

Sömu sögu er þó ekki að segja um alla rótgróna veitingastaði. Hornið, sem hefur verið rekið í Hafnarstræti í Reykjavík um árabil, skilaði til að mynda aðeins rúmlega 680 þúsund króna hagnaði árið 2013 en eigið fé félagsins sem á staðinn er neikvætt um 58 milljónir króna. Skyndibitastaðurinn Nonnabiti, sem einnig er í Hafnarstræti í Reykjavík og Bæjarlind í Kópavogi og er löngum orðin þekktur Íslendingum, einkum þeim sem bregða sér út á lífið, skilaði hins vegar tapi upp á rúmar 280 þúsund krónur.

Umfjöllun Ísland í dag um 35 ára afmæli Hornsins má sjá í spilaranum hér til hliðar.

Aðrir staðir sem Vísir skoðaði voru Potturinn og pannan, Sægreifinn og Ítalía. Sá síðastnefndi, sem staðsettur er á Laugavegi, skilaði hóflegum 3,6 milljóna króna hagnaði sem hjálpaði til við að bæta eiginfjárstöðu félagsins, sem var neikvæð um tæplega níu milljónir króna. Potturinn og pannan skilaði hins vegar tæplega fimm milljóna króna tapi. Sægreifinn skilaði fjögurra milljóna tapi. Staða félagsins sem heldur utan um staðinn er þó nokkuð góð, með jákvætt eigið fé um sextán milljónir.