HB Grandi með rúmlega 10 prósent alls aflamarks

Fiskistofa hefur úthlutað 368.500 þorskígildistonnum fyrir komandi fiskveiðiár sem hófst í dag. Á síðasta fiskveiðiári var úthlutað 367.060 tonnum og nemur aukningin á milli ára því tæplega 1500  tonnum.

Fimmtíu stærstu fyrirtækin í sjárvarútvegi frá alls 86 prósent allrar úthlutunarinnar í sinn hlut sem er álíka hátt hlutfall og á síðasta ári.  Alls fá 418 fyrirtæki eða lögaðilar úthlutað nú eða um 40 aðilum færra en í fyrra.

Fram kemur á vef Fiskistofu að úthlutun í þorski er rúmlega 190 þúsund tonn og hækkar um 18.300 tonn frá fyrra ári. Ýsukvótinn hækkar um tæp 5 þúsund tonn og fer í 28.950 tonn. Nokkur aukning milli ára er í úthlutun í flestum kvótategundum en þó er nokkur samdráttur í flatfisktegundum. Úthlutað aflamark er alls 435.650 tonn sem er um 3.500 tonnum meira en á fyrra ári enda þótt síldarúthlutun nú sé um 17 þúsund tonnum minni en í fyrra.

HB Grandi fær mest úthlutað til sinna skipa eða um 10.1 prósent af heildarúthlutuninni. Næst á eftir kemur samherji með 5.9 prósent og því næst Þorbjörn hf. 5.5 prósent en þetta er sama röð efstu fyrirtækja og undanfarin ár.

Þá fer mest til skipa með heimahöfn í Reykjavík eða 12,4 prósent af heildinni samanborið við 12,9 prósent í fyrra. Næstmest fer nú til Grindavíkur, eða 11,4 prósent af heildinni sem er aukning um eitt prósentustig frá fyrra ári og fleytir þeirri höfn fram úr Vestmannaeyjum sem löngum hefur verið í öðru sæti hvað aflamark varðar. Skip með heimahöfn í Vestmannaeyjum ráða nú fyrir 9,9 prósent úthlutunarinnar, en það felur í sér 0,6 prósentustiga samdrátt frá fyrra ári.

Alls fá 534 skip úthlutað aflamarki í upphafi nýs fiskveiðiárs samanborið við 578 á fyrra ári. Það skip sem fær úthlutað mestu aflamarki er Kaldbakur EA 1, en hann fær 8.111 þorskígildistonn eða 2,2 prósent af úthlutuðum þorskígildum.

Nánar um úthlutinina á vef Fiskistofu.