Mótmælendur hópast á Austurvöll

Talsverður fjöldi fólks er mættur á Austurvöll til að mótmæla aðgerðum ríkisstjórnarinnar í Evrópusambandsmálum. Tilkynnt var um það á fimmtudag að Gunnar Bragi Sveinsson utanríkisráðherra hefði afhent forseta ráðherraráðs sambandsins bréf þar sem fram kæmi að Ísland vildi ekki vera álitið umsóknarríki. 

Samkvæmt upplýsingum frá lögreglunni er talið að yfir sjö þúsund manns séu á staðnum en um fimm þúsund og fimm hundruð höfðu boðað komu sína á mótmælin í dag. Þau eru önnur mótmælin sem fara fram á Austurvelli eftir að upplýst var um ákvörðun ríkisstjórnarinnar á fimmtudag. 

Fundarstjóri verður Sif Traustadóttir en meðal ræðumanna eru Illugi Jökulsson rithöfundur og Jórunn Frímannsdóttir, fyrrverandi borgarfulltrúi Sjálfstæðisflokksins.

Hægt er að fylgjast með beinni útsendingu frá Austurvelli í gegnum vefsíðu Mílu.