Tollverðir stöðvuðu dagatöl sem innihéldu kókaín

Tollverðir stöðvuðu fyrr í ár sendingu af dagatölum sem reyndust innihalda samtals 100 grömm af kókaíni. Þetta kemur fram í tilkynningu frá embætti Tollstjóra en umrædd bögglapóstsending innihélt 34 pappírsdagatöl heftuð á pappaspjöld.

Hafði kókaíninu verið komið fyrir í dagatölunum m.a. með því að bleyta pappann með upplausn sem innihélt efnið. Sendingin kom frá Brasilíu og var stíluð á íslenskan einstakling. Málinu var vísað til lögreglu, en það telst óupplýst.

Tollstjóri minnir á fíkniefnasímann 800-5005. Í hann má hringja til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.