Tvísköttunarsamningur við Albaníu undirritaður

Samningur milli Íslands og Albaníu hefur verið undirritaður til að komast hjá tvísköttun og nær samningurinn til tekjuskatta. Gunnar Bragi Sveinsson utanríkisráðherra undirritaði samninginn fyrir Íslands hönd og Ditmir Busahti utanríkisráðherra af hálfu Albaníu.

Í tilkynningu frá utanríkisráðuneytinu segir að markmiðið með undirritun samningsins sé ekki eingöngu að koma í veg fyrir tvísköttun tekna heldur einnig að koma í veg fyrir undanskot tekna meðal annars með upplýsingaskiptum.

„Helstu efnisatriði samningsins eru þau að afdráttarskattur af arði er 5% ef félagið sem móttekur arðinn á a.m.k. 25% í félaginu sem greiðir arðinn en í öðrum tilvikum er 10% afdráttarskattur. Jafnframt var samið um 10% afdráttarskatt af bæði vöxtum og þóknunum.“

Stjórnvöld munu á næstu mánuðum vinna að fullgildingu samningsins í báðum samningsríkjunum og er vonast er til að samningurinn komi til framkvæmda 1. janúar 2016.