Borg bruggar tunnuþroskaðan bjór

Borg Brugghús, sem er í eigu Ölgerðar Egils Skallagrímssonar, ætlar að framleiða bjór til útflutnings sem verður látinn þroskast í eikartunnum.

Bjórinn sem um ræðir heitir Garún og verður geymdur á búrbonviskítunnum. Brugghúsið hefur framleitt og selt bjórinn til Bandaríkjanna og í verslunum ÁTVR en hann hefur aldrei áður verið látinn þroskast í tunnum.

„Við erum að bíða eftir að fá helling af búrbontunnum frá Bandaríkjunum. Við lítum á þetta sem útflutningsverkefni en bjórinn gæti einnig læðst í verslanir hér heima,“ segir Sturlaugur Jón Björnsson, bruggmeistari hjá Borg Brugghúsi.

Árið 2013 setti fyrirtækið þorrabjórinn Surt 8.1 í sölu. Hann var látinn þroskast í koníakstunnum.

„Við erum núna með sex til átta eikartunnur í húsi og erum búnir að fylla nokkrar. En sá bjór gæti endað sem þorrabjór frá okkur,“ segir Sturlaugur. Hann bætir við að starfsmenn brugghússins hafi einnig gert prufanir með sérrítunnum.

„Maður er í raun að krydda bjórinn með því sem var áður í tunnunni. Svo að sjálfsögðu líka að reyna að ná einhverju sem gæti verið eftir af eikarbragðinu. Það er hægt að leika sér endalaust með þetta.“

Sturlaugur segir tunnurnar augljóslega fela í sér aukinn kostnað.

„Og ekki síður tíminn og vinnan við þetta allt og geymsluplássið sem fer í að láta þetta standa og þroskast.“