Samdráttur varð í flugferðum Íslendinga síðasta sumar

Yfir sumarmánuðina í fyrra flugu fimm þúsund færri íslenskir farþegar frá Keflavíkurflugvelli en í júní, júlí og ágúst árið 2012.

Í frétt á vefnum turisti.is kemur fram að samdrátturinn hafi numið rúmum fjórum prósentum en sumrin á undan hafi ferðagleði Íslendinga aukist jafnt og þétt milli ára. Skortur á hagstæðum flugmiðum og pakkaferðum kunni að hafa haft áhrif því samkvæmt fréttum komust færri út en vildu þegar líða tók á sumarið og fólk var orðið langþreytt á veðurfarinu.

Strax í september fjölgaði ferðum landans til útlanda á ný og í október fóru nærri þrjátíu og átta þúsund Íslendingar út. Þetta er í fyrsta skipti sem vinsælasti ferðamánuður ársins er ekki einn af sumarmánuðunum þremur samkvæmt talningum Ferðamálastofu sem ná aftur til ársins 2002. 

Í fréttinni segir að í maí síðastliðnum hafi áætlunarferðir til 43 borga verið í boði en í vetur hafi áfangastaðirnir verið tæplega þrjátíu á mánuði. Þá hafi tíðni ferða á vinsælustu staðina einnig aukist í byrjun sumars og nú nái leiguflug á vegum ferðaskrifstofa hámarki.

Jafnframt kemur fram að þó framboðið aukist mikið á þessum tíma árs þá dreifist utanlandsferðir Íslendinga núna jafnara yfir árið. Þannig hafi að meðaltali rúmlega þrjátíu og fimm þúsund Íslendingar farið út á mánuði síðastliðið sumar en yfir hina níu mánuðina var meðaltalið tuttugu og átta þúsund farþegar. Því hafi tæplega fjórðungi fleiri Íslendingar að jafnaði flogið til útlanda í júní, júlí og ágúst í samanburði við aðra mánuði.

Munurinn á þessum tveimur tímabilum hafi hins vegar verið mun meiri fyrir áratug. Sumarið 2003 hafi til að mynda að meðaltali rúmlega þrjátíu og tvö þúsund Íslendingar farið út yfir sumarmánuðina en yfir hina mánuði ársins var meðalfjöldinn 21.650 manns eða helmingi færri.