Tækifæri Norðurslóða sigla framhjá Íslandi

Dýrasta skip Íslendinga, sem verið er að smíða til að þjóna Norðurslóðum, mun að óbreyttu ekki fá heimahöfn á Íslandi. Útgerðarmaðurinn segist ekki geta keppt við skip skráð í Færeyjum.

Þriðja sérleyfinu á Drekasvæðinu, og því síðasta í þessari atrennu, verður úthlutað í Þjóðmenningarhúsinu á morgun. Það er hins vegar óvíst hvort útgerðir sem stefna á skipaþjónustu við olíuleit vilji hafa heimahöfn á Íslandi.

Steingrímur Erlingsson, framkvæmdastjóri Fáfnis Offshore, er láta smíða sérhæft skip til öryggis- og olíuþjónustu á Norðurslóðum fyrir á áttunda milljarð króna. Hann samdi í fyrra við Fjarðabyggð um að hún yrði heimahöfn þessa dýrasta skips Íslendinga en nú hafa runnið á hann tvær grímur. Hann segir að skráning á Íslandi þýði að skipið verði ekki samkeppnishæft við nágrannaþjóðir eins og Færeyinga, sem bjóði upp á þægilegra umhverfi fyrir útgerð sem þessa.

Skipið verður sjósett í Tyrklandi í mars og síðan dregið til Noregs þar sem lokið verður við smíðina í sumar. Steingrímur spyr hvort þessi tegund nýrrar atvinnugreinar Íslendinga hljóti sömu örlög og fraktskipin, að vera með erlenda heimahöfn, þegar tækifærin koma á Norðurslóðum. Olíufélög eins og Statoil og Shell séu búin að skuldbinda sig að vinna við Austur-Grænland næstu 16 árin.

„Það er meðal þess sem Fáfnir er að gera. Við erum að byggja skip sem þola þessar aðstæður og gerð til að vinna á Norðurslóðum. Það er ekkert annað en eðlilegt að við gerum þetta með íslensku hugviti og íslenskum sjómönnum,” segir Steingrímur í viðtali við Stöð 2, en hann fjallaði um þessi mál á fundi Norðurslóða-viðskiptaráðsins og PwC í Reykjavík í morgun.

Hann vill að Íslendingar hafi alþjóðlega skipaskráningu að hætti Færeyinga, sem hafi náð að draga til sín á annað hundrað skip, sem sigli um öll heimsins höf á færeyskum fána. Það sé ekki verið að tala um snuða íslensk launakjör, þvert á móti að skapa hálaunastörf, sem krefjist töluverðrar skólagöngu.

„Þetta eru sérstök störf, hátekjustörf. Þannig að þau verða til þá á Íslandi og Íslendingar munu fá þau,” segir framkvæmdastjóri Fáfnis Offshore.

Hann lætur á sér skiljast að ekki sé nóg að tala um það í hátíðarræðum að Íslendingar nýti tækifæri Norðurslóða.

„Við þurfum að girða okkur í brók ef við ætlum að taka þátt í þessu. Annars siglir þetta framhjá okkur.”