Skipti selja 2,6 milljarða kröfu á Glitni

Skipti hf. hafa selt kröfu félagsins á hendur Glitni. Hagnaður félagsins af sölunni nemur 305 milljónum króna. Í rekstraruppgjörum félagsins var krafan færð á 2.300 milljónir króna í bókum félagsins, en hún var seld á 2.600 milljónir. Í tilkynningu segir að kaupandi kröfunnar sé erlend fjármálastofnun og er greitt fyrir kröfuna með reiðufé.

„Við erum mjög ánægð með þessa sölu sem markar lok á löngu ferli og eyðir ákveðinni óvissu í efnahagsreikningi félagsins. Söluverðið er mjög ásættanlegt og lausafjárstaða félagsins er nú enn sterkari en áður,“ segir Orri Hauksson forstjóri Símans og Skipta, í tilkynningu.

Skipti fram kröfur á hendur Glitni vegna framvirkra gengissamninga. Krafan á Glitni var upphaflega færð til bókar á 9,5 milljarða króna. Glitnir hefur viðurkennt kröfuna. Árið 2011 höfðuðu Skipti mál á hendur Glitni vegna uppgjörsgengis samninganna og töpuðu Skipti því máli í héraðsdómi á árinu 2013 og í hæstarétti á árinu 2014.