"Það verður ekki mikil vorveiði hér"

Nú er ekki nema rétt mánuður í að veiðin hefjist en 1. apríl opna nokkur vötn og sjóbirtingsár fyrir veiðimenn.

Það er þó heldur ólíklegt að mikið verði veitt á norður og norðausturlandi ef veður verða áfram eins og þau hafa verið því þar er allt á kafi í snjó og veðurspáin segir að það sé bara að snjóa meira næstu viku.  Litlaá í Keldum sleppur því í hana rennur volgt vatn og hún þess vegna íslaus að mestu eða öllu leiti.  Bragi Einarsson ,sem veiðir mikið á norðurlandi ,var ekki bjartsýnn þegar við heyrðum í honum í morgun.  "Þetta minnir á önnur snjóþung ár og þá var ekkert hægt að veiða fyrr en í lok apríl í flestum vötnum og jafnvel seinna.  Ég man sum árin þegar t.d. Vestmannsvatn, Kringluvatn, Ljósavatn og Sléttuhlíðarvatn voru ennþá með ís 1. maí og mér sýnist þetta ár ætla að verða eins.  Miðað við snjóþyngsl þá verður ekki mikil vorveiði hér" sagði Bragi, heldur þungur á brún yfir útlitinu fyrir norðan.

Sama staða er uppi fyrir vestan en þar er mikið fannfergi.  Það er helst að suðvesturland, suðurland og hluti austurlands komi til með að sleppa en víða er bara föl á láglendi og ekki mikill ís á sumum vatnana.  Komi hressileg hláka í 2-3 vikur verður ísinn fljótur að fara.  En á meðan ísinn er traustur er þá ekki bara spurning um að dorga í stað þess að kasta flugu?