Slitastjórnir föllnu bankanna boðaðar á fund

Ráðgjafar ríkisstjórnarinnar hafa skilað tillögum að fullbúnum hugmyndum um afnám fjármagnshafta. Slitastjórnir Glitnis, Kaupþings og Landsbankans hafa verið boðaðar á fund ráðgjafarnefndar um losun fjármagnshafta næstkomandi þriðjudag.

Bjarni Benediktsson, fjármála- og efnahagsráðherra, sagði í fréttum Stöðvar 2 í fyrrakvöld að framkvæmdanefnd um afnám fjármagnshafta myndu skila fullmótuðum tillögum í þessari viku. Nánari upplýsingar um framkvæmdanefndina má sjá hér. 

Samkvæmt heimildum upplýsingum fréttastofu hefur þessum tillögum nú verið skilað til stýrinefndar um afnám hafta sem Bjarni Bene­dikts­son leiðir. Aðrir full­trú­ar í stýr­i­n­efnd­inni eru seðlabanka­stjóri, ráðuneyt­is­stjór­ar for­sæt­is- og fjár­málaráðuneyt­is og Bene­dikt Árna­son, efna­hags­ráðgjafi for­sæt­is­ráðherra.

Á meðal þess sem framkvæmdanefndin leggur til er tillaga um flatan útgönguskatt á allt fjármagn í eigu slitabúanna, samkvæmt upplýsingum fréttastofu. Nefndur hefur verið 35 prósenta flatur skattur á fjármagn í eigu slitabúanna en sú tala hefur þó ekki fengist staðfest. Þá verða kynntar hugmyndir um framtíðareignarhald á Íslandsbanka og Arion banka, sem í dag eru báðir í eigu erlendra kröfuhafa, þ.e. slitabúa Glitnis annars vegar og Kaupþings hins vegar.

Þörf að rökstyðja undanþágubeiðnir

Slitastjórnir allra stóru föllnu bankanna Glitnis, Kaupþings og Landsbankans hafa verið boðaðar á fund á Grand hóteli á þriðjudag með framkvæmdanefnd um afnám fjármagnshafta. Ekki stendur til að ræða þessar tillögur þar og er talið ósennilegt að tillögurnar verði kynntar formlega á þessu ári.

Í fundarboði er farið fram á að slitastjórnirnar geri grein fyrir undanþágubeiðnum slitabúanna frá fjármagnshöftum og rökstyðji hvernig undanþágurnar geti samrýmst áformum um afnám hafta bæði út frá efnahagslegu og samfélagslegu sjónarmiði og með tilliti til jafnræðissjónarmiða. Í tilviki Kaupþings og Glitnis var óskað eftir undanþágum í tengslum við nauðasamninga þessara banka. 

Fulltrúar slitastjórna sem fréttastofa ræddi við sögðust ekki vita hvaða sjónarmiðum stjórnvöld byggðu á en sögðust fagna því að raunverulegar viðræður stjórnvalda við slitastjórnir væru að hefjast.

Fundurinn með slitabúum föllnu bankanna á þriðjudag og undanþágan sem slitabú Landsbankans fékk til að greiða forgangskröfuhöfum vegna Icesave þykir vera til marks um að hjólin séu raunverulega farin að snúast þegar kemur að afnámi fjármagnshafta.