Drykkja á freyðivíni nálgast góðærisárin

Útlit er fyrir að sala á freyðivíni verði meiri á árinu sem nú er að líða en á öðrum árum frá efnahagshruninu. Í byrjun vikunnar höfðu tæplega 106 þúsund lítrar selst, næstum jafn mikið og í fyrra, en þá voru söluhæstu dagar ársins eftir.

„Um fjórtán prósent af heildarsölu freyðivíns selst á þessum tveimur síðustu dögum ársins og því er útlit fyrir að salan verði meiri en hún hefur verið frá árinu 2008,“ segir Sigrún Ósk Sigurðardóttir, aðstoðarforstjóri ÁTVR.

Alls seldust 106 þúsund lítrar af freyðivíni í fyrra. Salan hefur aukist ár frá ári frá 2009 þegar hún féll um 18 prósent milli ára.

Samkvæmt upplýsingum frá ÁTVR hefur meðalverð á seldu freyðivíni hækkað á árinu. Ekki liggur fyrir hvort sala á kampavíni hafi aukist milli ára en Sigrún segir allt stefna í aukningu í þeirri tegund freyðivíns.

„Hlutfall kampavíns í lítrasölu freyðivíns hefur verið í kringum fimm prósent. Svo hefur ólíkum tegundum af freyðivíni í verslunum ÁTVR einnig fjölgað en í árslok 2013 voru þær sextíu en 71 núna,“ segir Sigrún.

Greiningardeild Arion banka gerði kampavínssölu hér á landi að umfjöllunarefni í Markaðspunktum deildarinnar í maí síðastliðnum. Kom þar fram að salan á fyrstu fjórum mánuðum þessa árs var sautján prósentum meiri en á sama tíma í fyrra. Söluaukningin átti bæði við um dýrt sem ódýrt kampavín og fólst því ekki í að kaupendur væru að færa sig í auknum mæli í ódýrari tegundir kampavíns á kostnað dýrari.

„Í augum flestra er kampavín munaðarvara og þar af leiðandi eitt það fyrsta sem heimili, sem á annað borð hafa haft efni á að kaupa slíka vöru, skera við nögl þegar harðnar í ári. […] Svo virðist sem sala kampavíns gefi nokkuð góða mynd af gangi hagkerfisins á hverjum tíma og hefur hún skýra jákvæða fylgni bæði við hagvöxt og einkaneyslu,“ segir í umfjöllun greiningardeildarinnar.