Vilja opna stað í Leifsstöð

Eigendur Joe and the Juice á Íslandi hafa óskað eftir veitingarými í Flugstöð Leifs Eiríkssonar.

Þeir undirbúa sig nú, samkvæmt heimildum Fréttablaðsins, undir samningaviðræður við Isavia sem rekur Keflavíkurflugvöll. Fjárfestirinn Birgir Þór Bieltvedt og Eygló Björk Kjartansdóttir eru stærstu eigendur fyrirtækisins.

Isavia kynnti í vetur áform um breytingar á brottfararsal flugstöðvarinnar og efndi til forvals þar sem fyrirtækjum í verslunar- og veitingarekstri var boðið að sækja um aðstöðu í flugstöðinni. Forvalinu lýkur í haust og breytingum á salnum á að ljúka næsta vor. Isavia afgreiddi fjölda umsókna og ríkisfyrirtækið hefur undanfarna mánuði unnið að mati á þeim eftir ákveðnu ferli.

Tveir Joe and the Juice-staðir eru reknir á Kaastrup-flugvelli í Kaupmannahöfn og einn á Arlanda-flugvelli í Stokkhólmi. Fyrsti djús- og samlokustaður Joe and the Juice hér á landi var opnaður í Kringlunni í ágúst á síðasta ári og fleiri fylgdu í kjölfarið.