Hlemmur skoðaður í öðru ljósi

„Ég mun lýsa svona uppbyggingu þessa svæðis í kringum Hlemm og rekja sögu gömlu gasstöðvarinnar sem Megas söng um forðum,‘‘ segir Hjálmar Sveinsson borgarfulltrúi en hann leiðir göngu í kvöld um hverfið í kringum Hlemm.

„Síðan ætla ég að segja frá miðstöð íslenskrar bílasölu, þarna var stærsta bílasala landsins,‘‘ segir Hjálmar. „Síðan verður rakin saga Hlemms og hvernig stoppistöðin varð athvarf unglinga, meðal annars fyrrverandi borgarstjóra, Jóns Gnarrs.‘‘

Gangan er hluti af kvöldgöngum Borgarbókasafnsins og Listasafns Reykjavíkur en göngurnar fara fram alla fimmtudaga í sumar.

„Síðan ætla ég að tala um þá ofboðslegu uppbygginu sem er komin af stað þarna, sérstaklega á Höfðatorgi,‘‘ segir Hjálmar. „Sýnist sitt hverjum um þau stóru hús sem eru að rísa þarna en ég mun ræða uppbygginguna.‘‘

Hjálmar hefur sjálfur gríðarlegan áhuga á borginni og sögu hennar og það verður áhugavert að hlýða á hann flétta saman merkilega sögu svæðisins en gangan hefst klukkan 20.00 við Hlemm.