Tap á áframhaldandi starfsemi Bakkavarar

Breska matvælavinnslufélagið Bakkavör hagnaðist um 7,8 milljónir punda á síðasta ári, eða sem svarar 1.469 milljónum íslenskum krónum. Fram kemur í nýbirtum ársreikningi að hagnaðaraukning milli ára er nærri fjórföld, en árið 2012 nam hagnaður félagsins 2,1 milljón punda, eða sem svarar 395 milljónum króna.

Tap er þó af áframhaldandi starfsemi hjá félaginu samkvæmt ársreikningnum upp á 11,6 milljónir punda, eða tæpa 2,2 milljarða króna. Þar vegur þungt afskrift viðskiptavildar upp á 21,2 milljónir punda (tæpa fjóra milljarða króna).

Á móti kemur svo hagnaður af aflagðri starfsemi, en í aprílbyrjun gekk í gegn sala á starfsemi félagsins í Frakklandi og á Spáni sem samið var um seinni hluta nóvembermánaðar 2012. Fyrir starfsemina sem var seld fengust 28 milljónir punda, eða tæpir 5,3 milljarðar króna.

Stjórn félagsins leggur ekki til arðgreiðslu vegna ársins 2013, en stærstu eigendur félagsins eru bræðurnir Lýður og Ágúst Guðmundssynir.

Í tilkynningu með ársreikningi er haft eftir Ágústi Guðmundssyni, forstjóra Bakkavarar, að samstæðan hafi komist vel á veg í að ná markmiðum sínum á árinu. Lokið hafi verið farsællega við endurfjármögnun, eignir utan Bretlandseyja verið seldar og endurskipulagningu lokið á hluta starfseminnar sem lítið hafi gefið af sér. 

Þessum verkefnum hafi verið lokið á sama tíma og tekjuaukning samstæðunnar hafi verið umfram það sem gengur og gerist á markaðnum og framlegð hafi verið varin fyrir umtalsverðri verðbólgu hráefniskostnaðar.